روما .. فرانشيسكو توتى

فرانشيسكو توتى -36 سنه- بيقدم السنه دى مع روما عروض مذهله .. فأى لاعب فى عمر الكابيتانو بيتقال عليه خلص كوره و المدرب بيتعامل معاه على انه انتهى و بيبدأ يدور على بدايل ليه .

يمكن توتى كان محظوظ السنه ان اللى يدرب روما هو من قدمه الى النور فى البدايه و هو المدرب البوهيمى زيدنك زيمان

فالمدرب البوهيمى احسن استغلال توتى و بالفعل توتى فى المواجهات الكبرى كان استثنائى .. لكن السؤال زيمان عمل ايه عشان يخلى توتى يظهر بالمستوى ده ؟

أولا : عمل ستاره Screen قدام توتى ..

معروف فى لعبة كرة السله تكتيك الScreen او الستاره و هو ببساطه انه يمنع المراقب من التدخل على حامل الكره

زيمان معروف انه مدرب هجومى و ده خدم توتى انه يكون مدعوم بالظهير الايسر فريدريكو بالزاريتى و الارتكاز سواء ان كان مايكل برادلى , أليساندرو فلورنزى أو ميراليم بيانتش

, و ده يأخر نوعا ما فكرة التدخل الدفاعى مع توتى نظرا لأن توتى معروف بالمهاره و دقة و التمرير و ده هيبان فى حالتين الاولى هدف توتى التالت فى مباراة فيورنتينا

هنا واضح ان توتى اللى حواليه الدايره كان قدامه 3 لاعيبه فاضيين و ده اللى أخر التدخل على توتى و خلى توتى يحرز هدف ولا أورع على اللينك ده http://www.youtube.com/watch?v=ZfAmBRKx_d4

و هتلاقو على اللينك ده ملخص للمسات توتى فى متش فيورنتينا http://www.youtube.com/watch?v=FBOONq3CwYk

الحاله التانيه فى متش ميلان فى هدف روما التانى هنلاقى بالزايتى عمل أوفرلاب متميز ادى لتوتى المساحه و الوقت انه يرفع كوره لأوسفالدو ولا أروع يحرز منها الهدف

هنا السهم بيورى تحرك بالزاريتى و ازاى سحب معاه ماتيا دى تشيليو و ادى مساحه للكابيتانو و اللينك عليه الاسيست الرائع http://www.youtube.com/watch?v=5fSaLhuaMnA

تانى حاجه عملها المدرب العجوز مع توتى هى حرية الحركه فى الاستلام و مش كده و بس ده دايما حوالين اكتر من 3 لاعيبه بيساندوه

الفيديو ده بيبين حرية الحركه توتى استلم وسط الملعب و ادى بينيه ممتازه لأوسفالدو و منها كان هدف روما التانى https://www.youtube.com/watch?v=ZTUW8N3QRj0

أخر حاجه لو انت لعيب فيفا هتلاقى ان توتى بطيئ جدا لكن عند رؤيه و تمرير و تسديد .. زائد ان زيمان اداله حرية حركه نتج عن ده 6 اهداف و 5 صناعة هدف ..

ملحوظه ماتيا ديسترو مضى لروما لأنه كان حلم حياته يلعب جنب توتى

تابعونى على تويتر للمناقشه و كده :@amrgrendo و باشكر @Nsoo7y سمحلى انى استخدم فيديو من تحليلاته

تحليل هجوم مالاجا .

في وسط زحمة الصفقات في الانتقالات الصيفية و انتهاء اليورو كل اللي كنا نسمعه عن ملجا هو أن النادي حيعلن إفلاسه بعد ما أتأهل للشامبينز ليج ! , و ابتدى توقع هبوط مستوى النادي بعد بيع أهم مفاتيح اللعب للفريق الموسم الماضي ( كازورلا و خوسيه روندون ) , الغريب في الموضوع أنو في لاعبيين ذي إيسكو و ناتشو مونريال صمموا على البقاء مع الفريق و كان معظم كلامهم فيه تفائل للموسم الجديد ودا طبعا كان كلام غريب منهم وقتها , أحد الماتشات الودية كانت أمام يوفنتوس و ظهر أنو الفريق قادر على صنع الفرص بسهولة مع صانع ألعاب مثل إسكو و أجنحة سريعة ذي إليسيو و مونريال , نقسم هجوم مالاجا لجزئين أول واحد تحركات كام لاعب و تقدم الظهير الأيمن و الأيسر للمساندة,  الفيديو اللي تحت بيظهر بداية إسكو المبشرة قبل الهيصة دي متتعمل عليه .

1 . اللامركزية

قصدي بالكلمة دي هي أنو مفيش لاعب في هجوم ملجا بيلتزم بمركزوا , بيلجريني طالبهم بالحرية في التحرك في كل أنحاء الملعب , من أكتر اللاعيبة اللي استفادوا من الموضوع دا كان خواكين و إيسكو , الاتنين عندهم ذكاء مش طبيعي في التمركز و مهاريا على مستوى عالي جدا , طبعا لما يكون عندك مهاجم ذي سافيولا مش حيكون ليه لازمة ترفع الكرة لمنطقة الجزاء عشان مفيش أمل سافيولا يجيبها , عشان كدا سافيولا استفاد من حرية الحركة و تبادل المراكز مع خواكين و إليسيو ( الجناح الشمال ) , الصور حتشرح الموضوع دا بطريقة أسهل .

خواكين و سافيولا ( الخط الأسود ) 

في الصورة دي خواكين سايب مركز الجناح اليمين و ضم على جوا و جنبوا سافيولا و إيسكو .

خواكين ( الأحمر ) , إسكو ( الأسود ) , سافيولا ( إسود)

هنا خواكين بقى مهاجم بعد ما سافيولا نزل لنص الملعب و لعب الكورة لإيسكو , تبادل المراكز بيخلي مراقبة اللاعب الواحد صعبة جداا !

خواكين ( الأحمر) , سافيولا و إسكو ( الأسود )

خواكين بقى مهاجم و شغل المدافعين و سافيولا بقى فاضي و إيسكو مغطي مركز الجناح اليمين , تبادل مراكز بسرعة !

و هنا خواكين ( الأحمر) بقى في الجناح الشمال و إسكو ( الأسود) بقى في مركز صانع لعب , من الكام صورة اللي فاتوا بيبان قد أيه المجهود البدني المبذول من التلاتة بالذات إيسكو و خواكين لأنو مطلوب منهم الدفاع برضوا , اللامركزية اللي بتلعب بيها برشلونة مطبقة في ملجا و طريقة اللعب دي مش جديدة على بيلجريني لأنو عملها مع فياريال قبل كدا , بس نجاح الموضوع بيحتاج حاجة تانية و هي تحرك الظهيرين الشمال و اليمين و اللي في الكام صورة الجايين حيبان قد أيه مطلوب منهم أنهم يزيدوا أوي و بسرعة عشان يساندوا الهجوم و يغطوا مراكز الأجنحة .

2. تقدم الأظهرة

خيسوس جوميز الباك اليمين ( أحمر ) , إيسكو و خواكين ( أسود )

خيسوس جوميز الباك اليمين ( أحمر ) ,  خواكين ( أسود )

ناتشو مونريال الظهير الأيسر ( أحمر )

ناتشو مونريال الظهير الأيسر ( أحمر ) , خواكين و سافيولا ( أسود )

ريال مدريد vs مانشستر سيتي : قبل الماتش

المرة دي حكتب بالعربي الفصحة عشان كثرة الاخطاء الاملائية بالهبل اللي ظهرت في الموضوعين اللي فاتوا , بس قبل متحول للكتابة حقول كلمتين هي أنو بما أن الفرقتين كاملين و مفيش اصابات كتيرة , فحكتب عن عن توقعاتي عن اكتر الاماكن في الملعب اللي حيحدوا مصير الماتش النهاردة و المعارك ما بين اللاعيبة , نبتدي العربي الفسحة بقى ..

مايكون Vs رونالدو

نظرا لهبوط مستوى رونالدو في الاونة الأخيرة يتوقع البعض انتصار مايكون في هذه المواجهة و تقليل من خطورة رونالدو في الجناح الأيمن , لكن حتى وأن كان رونالدو غائب و دون المستوى فيمكنه أن يحرز أهدافا من أنصاف الفرص و أيضا يمكنه اللعب في أكثر من مركز في الهجوم , لكن مايكون سيجد راحة كبيرة عندما يشارك المان سيتي في الهجوم فهو في طبيعة لعبه يحب ان يتقدم للأمام في كل فرصة , وهذا سيجعل مارسيلو ( كوينتراو ) يعاني دفاعيا في هذه الجهة , لذا ستكون هذه مواجهة مثيرة لنعرف كيف سيتصرف المدربين حيال هذا الموضوع .

يايا توريه و دايفد سيلفا Vs تشابي ألونسو و خضيرة

في هذه المواجهة تحديدا اظن أن مورينيو سيلجأ لحل لاعب خط وسط مساند مثل مودريتش و عدم المغامرة بأوزيل و تكرير نفس خطأ مبارة بايرن ميونخ الموسم الماضي , من ناحية المواجهة الفردية سنجد يايا توريه سيكون ضد خضيرة و كلنا نعرف من سينتصر في هذه المواجهة و دايفد سيلفا و ألونسو , و بما أن الفريقين يفضلون في الاستحواذ على الكرة فسيكون نصف الملعب كلمة السر في هذا الموضوع .

مارسيلو (كوينتراو) Vs نصري 

هذه المواجهة مثل مواجهة مايكون برونالدو , فنصري من نفس نوعية رونالدو من حيث مراقبة الظهير الايسر و مارسيلو لديه نفس خصائص مايكون و يحب مشاركة الهجوم و مساعدة رونالدو , فعدم عودة نصري سيشكل زيادة عددية على مايكون و هذا ما يجعلني اظن أن مانشيني سيلجأ لميلنر إذا وجد مشكلة في هذه الناحية .

مودريتش Vs خافي جارسيا ( جاريث باري )

هنا يجب على مودريتش أن يبرر لماذا دفع فيه الريال مبلغ ال40 مليون يورو , ستكون مواجهة مثيرة لأن تفوق مودريتش فيها سيجعل للريال اليد العليا في الاستحواذ , و مع دخول اوزيل للعمق سيجعل هناك زيادة عددية في هذه المنطقة بالتحديد و هذد صورة توضيحية أكتر من موقع الجارديان .

اوليفر جيرود و التحرك من غير كرة !

بالنسبة لناس كتيرة من مشجعين ارسنال جيرود كان حاجة مجهولة ولا يعرفوا امكانياتوا ولا يعرفوا عمل ايه مع مونبيليه , ممكن اللي عارفينه انو دي صفقة جات لتعويض فان بيرسي الهداف , عشان يبقى احسن خلف لفان بيرسي الجمهور عايز يشوف مكنة تهديف عشان على الاقل يبقى قريب من المهاجم الهولندي اللي مولعها في المان يونايتد , بس طبعا الاختلاف ما بين طريقة لعب الاتنين كبير اوي , جيرود الموسم اللي فات مع مونبيليه جاب 21 هدف و صنع 12 هدف يعني هو اساسا هداف و عندو الامكانيات , فان بيرسي جاب 36 هدف و صنع 14 هدف , جيرود معظم الوقت بيكون لازق و بيغلس على الاتنين المساكين بتوع فريق الخصم , لكن فان بيرسي بينزل لتحت و بيروح للاطراف يمين و شمال يعني كان واخد حرية كبيرة لأنو اول مجيه ارسنال لعب اول 4-5 سنين كجناح لكن في التحرك من غير الكرة الاتنين ممتازين بس حنركز في الموضوع دا على جيرود !

سانتي كازورلا صانع العاب عالي اوي بس ايه الفايدة لما ميكونش قداموا مهاجمين اذكية , نفس الموضوع دا مع يونس بلهندة صانع العاب مونبيليه اللي كان مستفيد اوي من اللعب مع مهاجم بذكاء جيرود في التحرك من غير كرة , بلهندة احرز 12 هدف و صنع 6 ,4 من الستة كانوا لجيرود .

في ماتش ليفربول و ارسنال الاخير ممكن كان في نظر ناس جيرود كان محبط لكن الحقيقة كان ليه دور مهم في الهدف الاول اللي جابوا بودولسكي من تمريرة جميلة من سانتي كازورلا , حنشوف في الصور ايه كان دور جيرود في الجون الاول .

 هنا بعد مع بودولسكي مرر الكرة لسانتي كازورلا و ابتدا يجري في اتجاه السهم , حتلاحظ انو جيرود كان رايح يجري ما بين سكرتل و دانيال اجر اللي المسافة بينهم كبيرة .

هنا جيرود غير رأيوا و اتجه الناحية التانية خالص و سحب معاه دانيال أجر , كمان سكرتل اتجه الناحية دي وساب المساحة الكبيرة في الدايرة فاضية , كل دا الاتنين مشغولين بجيرود وسايبين بودولسكي .

أجر هنا بيحاول يلحق نفسوا و ساب جيرود , المسافة بين سكرتل و اجير بقت صغيرة و دا ساب مساحة كبيييرة فاضية لبودولسكي اللي جري وحطها جون , التحرك من جيرود شغل الاتنين المساكين و ساب المساحة الكبيرة دي ,

دا فيديو توضيحي بزيادة :)

كان في هجمة في ماتش سندرلاند انفرد جيرود بعد تمريرة من سانتي بس هو ضيعها , في ماتش ليفربول كان في هجمة من نفس الاستايل مع ابو ديابي بس هو ضيعها برضوا , بس الفكرة مش في تضييع الهجمة قد مهي عن التحرك من غير كرة .

في الهجمة اللي فاتت فتح مساحة كبيرة لبودولسكي , لكن في الهجمة هنا فتح مساحة لنفسوا عشان يستقبل التمريرة من ابو ديابي حتبان في الكام صورة اللي جايين .

الخلاصة :

جيرود لاعب ذكي و تحركاتوا من غير كورة ممتازة احسن من الشماخ و بندتنر بكتير بس حتى ولو كان بيواجه مشاكل في التسجيل ,حيكتسب الثقة مع الوقت و حيكون احسن ,مع خط وسط ممتاز و اجنحة بتساعدوا اظن ارسنال حيبقى هجوميا احسن بكتير من الموسم اللي فات .

ليه الريال حيموت على مودريتش ؟!

من قيمة 3 سنين كدا بعد ماتش الكسيكو الشهير (6-2)ابتدت ثورة في خط الوسط و ابتدت الفرق في تنفيذها و الاستغناء عن الفكر القديم انو يكون في خط الوسط على الاقل اتنين مميزاتهم اللياقة البدنية العالية على حساب مهارتهم الكروية وكان وسط الريال وقتها عبارة عن ( جاجو و لاس و ممادو ديارا ) . كان انيستا و تشافي هما خير دليل على نجاح الموضوع دا . ابتدت الفرق في انها تطور من لاعيبة عندها مهاريين انهم يلعبوا في مركز الارتكاز و ظهرت اسامي كبيرة اوي منها ويلشير و يايا توريه مع مانشستر سيتي . و مدربين تانيين حولوا لاعيبة كانو بيلعبوا في مركز الجناح لانهم يلعبوا في الارتكاز زي مودريتش و شفاينشتايجر .

مميزات مودريتش :

1- ناشف اوي 

كنت بستغرب ازاي واحد زي مودريتش قصير و نفع في الدوري الانجليزي ومكانش بيلعب جنبوا لاعب ارتكاز صرف زي جيناس او هدلستون . و ساعات كان بيلعب ارتكاز بس مكانش مستواه عالي زي بلاسيوس او ساندرو . لكن بعد الفرجة على الماتشات لتوتنهام و التركيز عليه بالذات لقيت انو بيرمي نفسوا في كل الالتحامات و بيكسب معظمها و في لقطة ما انسهالوش كان دخل التحام كتف في كتف مع يايا توريه و خد الكورة منو في الاخر .يعني ممكن مدريد تلعب خط وسط من مودريتش و الونسو .

2- يشيل نص ملعب 

كانت مهمة لاعب الارتكاز اللي يلعب في توتنهام انو لو اتزنق يلعب لمودريتش لانو دايما يبلاقي الحلول . يأما تمريرة على الاطراف او ترقيصة يفتح لنفسو مساحة او تمريرة لقدام يعني دايما بلاقي حل و كان عبارة حلقو وصل ما بين الدفاع و خط الوسط الهجومي ( فان دير فارت  و بيل و لينون ) . في يورو 2008 كان نفس الموضوع مع اسبانيا كان بين تشافي و ماركوس سينا . سينا مكانش مطلوب منو اكتر من انو يديها لتشافي و يسيبوا يتصرف . و نفس الموضوع بين ويلشير و الكس سونج في ارسنال .

اتفرج و استمتع :)

ايه مشاكل الريال في خط الوسط ؟

اول حاجة اهتم بيها مورينيو في الصفقات كانت الاطراف (دي ماريا و اوزيل و كوينتراو ) دا غير وجود رونالدو و مارسيلو والريال اتبنى و اتصرف عليه علشان يكسب برشلونة و نسيوا انو ممكن يقابلوا فرق تانية غير برشلونة حتتعبهم في البطولات الاوروبية و منها بايرن ميونيخ . فبما انو صعب تلاعب برشلونة على الاستحواذ اول مبدأ كان انو الفرقة تنسى الاستحواذ و يتدرب على الهجمات المرتدة . و دا كان بيأثر عليه لما يلاعب فرق بتلعب على الاستحواذ زي فياريال و فالنسيا و اتلتيك بلباو .

1- خضيرة مش بتاع استحواذ

خضيرة ميزتوا مع المانيا انو بيقرا المساحات اللي بيعملها اوزيل او المهاجم و في ثانية تلاقيه واقف قدام الجون و منفرد . بس هجوم الريال اعتمد على الاطراف و ساب العمق لاوزيل اللي ساعات بيحب يروح ناحية الطرف و الونسو بيحب يلعب من تحت فدا بيسيب فراغ هجومي كبير في خط الوسط اللاعب الوحيد اللي واقف فيه هو خضيرة و امكانياته انو يستلم تحت ضغط و يصنع لعب ضعيفة  . طبعا في الصورة دي و اللي بعديها خضيرة بعيد عن مسار اللعب و سايب الونسو يغير الملعب يمين شمال و و مفيش اي تجربة انهم يخترقوا من العمق .

في اللقطة دي بيبي متقدم و سايب الونسو مغطي عليه و خضيرة في الناحية التانية برا اللعب تماما . طبعا اول لعيبة بتظهر بيكون يأما دي ماريا او اوزيل ( اللي ممسوك هنا ) و رونالدو . 

2- الونسو 

ايام الليفر الطريقة اللي كان بيلعب بيها بينيتز كانت بتغطي عيوب الونسوو كان في لاعب بيلعب قدامو لما الاطراف بتبقى مقفولة عليهم و هو الكابيتانو ستيفن جيرارد فمكانش ليه لازمة بالنسبة لالونسو انو يمشي بالكرة لقدام ( ودا مش استايلو اساسا) . بس في الريال هو مسؤول في الاول و الاخر عن خط الوسط كلو .يوم ما فرقة تعمل ضغط شديد على الريال الونسو بيلعب تمريرات خاطئة كتيرة و مبيعرفش يحافظ عليها .  في اللقطة دي بعد ضغط كروس عليه حيلعب كورة عالية و تكون بعيدة عن اوزيل .

اللقطة دي توضح مودريتش لما يجي حيكون واقف فين . هنا في مساحة كبيرة و الونسو بيحاول يتقدم عشان يساعد دي ماريا بس كان متأخر اوي و دي طبيعة مركزوا  و اوزيل بقى مهاجم . تأخر الونسو للخلف اوي و خضيرة بعيد عن اللعب بيخلف الفراغ الكبير اللي قولتوا في نص الملعب و دا بيمنع من انها تستحوذ قدام فرق اقل منها مش برشلونة او بايرن ميونخ حتى .

الخلاصة :

ناس كتيرة طالبت الريال انو يتعاقد مع ظهير ايمن و مدافع زيادة لكن من وجهة نظري دي الصفقة اللي الريال كان محتاجها عشان يبقى في مستوى الفرق اللي عندها لاعيبة خط وسط على مستوى عالي و معالجة مشكلة الاستحواذ اللي ظهرت في الموسم اللي فات في الماتشين بتوع نص النهائي بتاع البايرن و ماتشات كسبتها بصعوبة في الدوري برا ملعبها ذي فالنسيا و اتليتكو مدريد .