ذكريات فريق جميل : فياريال 2010/2011

من يفتكر المدرب دا ؟؟ خوان كارلوس جاريدو من أكتر المدربين اللي عملوا مفاجأة في أول موسم يدرب فيه فريق , و عمل فريق كان من أحلى الفرق اللي بتلعب كورة في الأرض و فريق كان ممتع جدا , و عمروا ما غير طريقته حتى لما لاعب ريال مدريد و برشلونة على ملعبهم , فرقة كان هجومها فيه النجم الإيطالي جوسيبي روسي و حط اي حد جنبوا ( نيلمار أو ماركو روبن ) , و خط وسط بيخدم عليه كان مكون من سانتي كازورلا و كاني و بورخا فاليرو , و الإرتكاز لاعب كورتوا حلوة جدا إسمه برونو سوريانو , طبعا دا غير كابديفيا و أنخيل كانو الباكات , و أخيرا حارس مرمى ريال مدريد الحالي دييجو لوبيز , المرة دي مش حيكون في شرح صور الموضوع حيكون فيديو أنا عاملوا من زمن , ممكن الصورة متكونش واضحة بس حاولوا تستمتعوا بطريقة لعب الفريق دا ضد ريال مدريد في البرنابيو .

إستمتعوا بالفيديو 

الجزء الثاني : مفهوم الدفاع عند لاودروب

إن كان في حاجة مبهرة في أداء سوانسي غير طريقة الهجوم و التمريرات القصيرة و الإستحواز اللي بيلعبوا بيه , فهي تمكن الفريق من إنو يخرج من ماتشات البيج 6 بأقل عدد من الأجوان ,كسب أرسنال 2-0 , قدام شيلسي و مان يونايتد إتعادل  1-1 , خسر ماتشات برا ملعبوا ضد المان سيتي و توتينهام 1-0 بشق الأنفس , دا غير ماتشات الكأس ضد أرسنال و شيلسي , و إن دل على شيء فهو إنو شغل لاودروب الدفاعي باين على الفرقة إنها بقت غلسة دفاعيا على أي فريق , إستقطاب المدافع شيكو الأسباني و الكوري كي سيونج , دا غير الأدوار اللي بيقدمها دي جوزمان و ميشو الدفاعية غير الهجومية , مع تطوير أداء معظم لاعبي النادي أهمهم ليون بريتون الإرتكاز المساند و  قلب الدفاع القائد أشلي ويليامز , في كام حاجة مميزة في طريقة دفاع الفريق ممكن نركز عليها .

الضغط الجماعي :

ميزة الضغط الجماعي إنو بيغطي عيوب اللاعيبة الدفاعية بزيادة عدد اللاعيبة في منطقة معينة و تقليص المساحة و خيارات التمرير , و فريق سوانسي بيظبط الموضوع دا على ملعبوا بالذات , في الكام صورة اللي جاية بيبان الضغط الممارس ضد شيلسي .

ضغط مبكر من الباك الشمال بين دافيس

4 لاعبين يقلصوا المساحة على صاحب الكورة

رقابة فردية على المهاجمين , و تقليص المساحات من لاعبي الإرتكاز

أي حد إرتكاز :

في مهام جديدة للاعيبة الإرتكاز عند لاودروب , أولا لازم لاعب الإرتكاز يعمل زيادة عددية دفاعية عند الأطراف سواء كان بريتون أو الكوري كي و دا خلاهم أقل فريق يتعمل عليه عرضيات الموسم دا , ثانيا المساحة اللي بتكون فاضية بيغطيها أي واحد فيهم أو أي حد من الثلاثة اللي قدامهم , الجناحين أو اللي في مركز صانع اللعب , بكدا دائما بيكون في لاعب في مركز العمق و دا بيصعب الموضوع أوي على أي فرقة الإختراق من العمق  .

الكوري كي يساعد الظهير الأيمن رانجيل و داير , و يقوم دي جوزمان ( الأزرق ) بتغطية مركزه في الإرتكاز

بريتون ( الأحمر ) يغطي مركز الإرتكاز لوحده .

ميشو هنا يقوم بتغطية مركز الإرتكاز

ميشو :

هو مش مجرد مكنة تهديفية بإحراز 13 جون و خلاص , هو أول بداياتو كان لاعب خط وسط مساند مع سيلتا فيجو , لكن الموسم اللي فات إستفاد منو فريق رايو فالكانو من اللياقة البدنية الهائلة اللي عندو كلاعب صانع لعب و كمان بيدافع , نفس الموضوع طبقوا لاودروب مع اللاعب بإنو بقى بيلعب في مركز متقدم و مطلوب منو دفاعيا الضغط على لاعب الإرتكاز في الفرقة التانية  .

ميشو يضغط بقوة على أرتيتا

كيف طور لاودروب سوانزى هجومياً ..

مفيش شك ان سوانزى من الفرق اللى بتقدم كوره حلوه السنه دى, فالفريق الويلزى بعد 22 اسبوع فى المركز التاسع مسجل 31 هدف و عليه 26 كما انه فاز فى سبع مباريات و تعادل فى تسعه و هزم فى ست مباريات !

يمكن سوانزى من السنه اللى فاتت و هو متبع طريقة لعب 4-3-3 و مع تغيير المدرب و قدوم المدرب الواعد و اللاعب الاسطورى الدنماركى مايكل لاودروب فهو قام بتعديلات فى خطة اللعب مع الحفاظ على الطريقه 4-3-3 و لكن تغيير واجبات اللاعبين ..

أولا لاودروب استقدم ثلاثى هجومى من العيار التقيل هما:

 بابلو هيرنانديز - جونتان دى جوزمان - ميتشو

فالمدرب الدنماركى بيعتمد على تدوير الكوره ما بين أقدام اللاعبين و التمرير القصير فكان من المهم استقدام ثلاثى بيقوم بالدور ده و هنلاحظ ان نسب التمرير للاعبى خط الوسط و الظيهيرين و المهاجمين تتراوح من 72 الى 92 %

و ده بيساعد سوانزى فى فكرة التدرج لمرمى الخصم و زى ما هيبان من الصوره اللى جايه من موقع www.whoscored.com نسب التمرير الصحيح من لاعبى سوانزى لو اتثنينا نسب الاتنين مساكين تشيكو رياس و آشلى ويليماز مع الحارس مايكل فورم هنلاقى الاتى:

خط الوسط المكون من جونتان دى جوزمان و كى سونج يونج , نايثن داير نسب تمريرهم ممتازه 88.8 و 92.3 و 87.3 % على الترتيب .

تانى حاجه و هى الاهم التحركات ..

فالفريق بيعتمد على تحركات ميتشو .. ميتشو أداؤه نوعا ما يشبه صامويل ايتو من ناحية الخبث فى التحرك فمره تلاقيه صانع ألعاب بيسقط من مركزه المبتدع من لاودروب و هو المهاجم الصريح و ميتشو مخيبش ظن مدربه و سجل 13 هدف !!

ميتشو امكانياته الجسديه أهلته ان يكون بيلعب مهاجم و صانع ألعاب أو حتى ارتكاز نظرا لطوله الفارع 191 سم و قدرته على التمرير بنسبة 77.8 % و اجادته فى الالتحمات الهوائيه و بالتالى ادى الفرصه لمدربه لاستغلاله فى التلات أماكن زى ما هتبين الصوره ..

اما ميتشو بيسقط كصانع ألعاب بيميل اللاعب وين روتليدج كمهاجم و بيدى حل لميتشو لعمل 1-2 (زى هدف أرسنال) كما بيساند ميتشو من الناحيه اليمنى نيثان داير و بيكون بابلو هيرناندز جناح فبيكون التمرير سهل و الحلول متنوعه للاعب الاسبانى

فالحاله الاولى فى مباراة أرسنال و سوانزى بتلخص الكلام اللى فوق

ميتشو عمل 1-2 مع روتليدج و سجل الهدف لكن الملاحظ ان المساحه اللى خلقها لنفسه بينه و بين خط الدفاع كبيره و خلاه يخترق بسهوله زى ما هنشوف فى الصوره الجايه

و طبعا لمشاهدة الهدف كله http://www.youtube.com/watch?v=81D2EN8xFyw
و ده كان ذكاء من لادروب لاستغلال كل طاقات لاعبه زائد تحركات لاعبين زى : هيرنانديز و داير و روتليدج و دى جوزمان و يونج حوالين ميتشو بالاضافه لمساندة الظهيرين


الحاله التانيه هو هدف يدرس من حيث التحركات و التمرير الدقيق (سوانزى ضد ويست برومويتش ألبيون الهدف الاول)



داير هنا معاه الكوره و زى ما فى الصوره ميتشو ساقط لورا و روتليدج كمهاجم صريح و بابلو هيرنانديز كجناح أيسر و داير لعب عرضيه للهيرنانديز

هنلاحظ المساحه اللى خلقها تحرك روتليدج لميتشو زائد ان تأخر ميتشو خدمه فى توقع المكان الامثل لنزول الكوره ..

هنا روتليدج اتحرك على العارضه القريبه لبابلو هيرنانديز سرق الدفاع و انتباه حارس المرمى و خلى الجميع يغفل عن ميتشو

هنا خلاص المساحه اتوفرت لميتشو و العرضيه كانت ولا أروع من هيرنانديز و ميتشو تابع بمهاره

و طبعا لينك لمتابعة الهدف كاملا http://www.youtube.com/watch?v=NJuhGhSn2NU
و ده بيأكد ان لاودروب طور من 4-3-3 لشكل مدى أريحيه و تحركات من غير كوره و فنيات عاليه جدا

ملحوظه دلوقتى العروض تنهال على ميتشو لكن اللى عاوز ميتشو ياخد معاه مايكل لاودروب
ملحوظه تانيه سوانزى استقدم ميتشو من رايو فالوكانو ب1.2 مليون يورو !!
أخر ملحوظه مايكل لاودروب مشروع مدير فنى كبير جدا

استنوا التحليل الدفاعى لسوانزى كجزء تانى للمقال مع صلاح الدين (twitter: @shepopdogg)

تابعونى على تويتر و للمناقشه twitter: @amrgrendo او فيسبوك Amr Ali